Duitser stuit Serena Williams se segetog

2012-08-18 08:03

Mason, Ohio – Die Olimpiese kampioen Serena Williams het haar eerste nederlaag in drie maande gely toe sy Vrydag deur die Duitser Angelique Kerber geklop is.

Kerber het Williams met 6-4, 6-4 verslaan om na die halfeindronde van die Cincinatti Ope in Amerika deur te dring.

Williams se ouer suster, Venus, het beter gevaar en Sam Stosur van Australië met 6-2, 6-7 en 6-4 geklop vir 'n plek in die halfeindronde.

In die mansafdeling sal Novak Djokovic Saterdag die geleentheid kry om wraak te neem teen die speler wat hom uit die Olimpiese toernooi geboender het.

Djokovic kom Saterdag in die Cincinatti Ope se halfeindronde teen Juan Martin del Potro van Argentinië te staan.

Die ander halfeindstryd is tussen Roger Federer en sy landgenoot en goeie vriend Stanislas Wawrinka.

Vir die jongste sportnuus volg Nuus24Sport op Twitter.

- Reuters