Dubbele goud vir Oscar Pistorius
2011-01-31 08:42
Pretoria - Oscar Pistorius het Saterdag op die Wêreldbyeenkoms vir gestremde atlete in Christchurch, Nieu-Seeland, eers die 400m (T44) gewen en enkele ure later ook gehelp om goud in die 4x100-aflos vir Suid-Afrika te wen.
Ampie Louw, Pistorius se afrigter, raak sommer erg opgewonde as hy oor die goue medalje in die aflos uitgevra word.
“Vir amper 16 jaar droom ek as afrigter van dié dag dat Suid-Afrika die goue medalje in die aflos wen, maar telkens het daar op kritieke tye iets verkeerd gegaan, wat daartoe gelei het dat ons nie ’n span kon inskryf nie.
“Saterdag was ’n eerste vir Suid-Afrikaanse gestremde atletiek.
“Die ouens – Oscar, David Roos, Samkelo Radebe en Arnu Fourie – het geen geheim daarvan gemaak nie dat hulle net met goud tevrede sal wees. Nie eens ’n besering kon David daarvan weerhou om deel te neem nie.
“Toe Oscar die aflosstokkie ontvang, het Jerome Singleton, die 100m-wêreldkampioen, seker ’n voorsprong van 10 meter gehad.
“So seker was die Amerikaners dat hulle sou wen dat een van hulle agter Jerome aangehardloop het met sy vuis in die lug gebal om reeds fees te vier.
“Maar toe bederf Oscar die Yanks se partytjie. Hy is só vinnig by Jerome verby dat dit gelyk het asof hy parkering soek. Oscar het ook dié keer slim gedink om eerste na die lyn te duik.
“Die wentyd was net 0.05 sekondes stadiger as die wêreldrekord.”
Volgens Louw het Pistorius doelbewus nie voluit in die 400m gehardloop nie omdat hy hom wou reghou vir die aflos.
“Oscar het maar in 48 sekondes gewen, maar tog was die televisiekommentators beïndruk. Een van hulle het spottend gesê dat daar net drie dinge in die lewe is waarvan ’n mens seker kan wees.
“Die eerste is dat jy belasting gaan betaal, die tweede is dat almal van ons eendag moet doodgaan en die derde is dat Oscar die goue medalje in die 400 op die Wêreld-atletiekbyeenkoms vir gestremde atlete sal wen.”
Suid-Afrika het 23 medaljes (9 goud, 7 silwer en 7 brons) gewen.
Vir die jongste sportnuus volg Nuus24Sport op Twitter.
- Sport24