Driekuns vir Brown en Lange
2010-10-19 07:30
Durban - Arran Brown en Malcolm Lange van die Medscheme-span het eergister een van die merkwaardigste driekunste in Suid-Afrikaanse fietsry vermag toe hulle die derde agtereenvolgende jaar die eerste twee plekke in die Amashovashova-ren gevul het.
Brown het die wedren van Pietermaritzburg na Durban gewen, met Lange ’n paar sentimeter agter hom. Taylor Day van EMG was derde oor die eindstreep.
Brown was ook verlede jaar se wenner en Lange was tweede. In 2008 het Lange gewen en was Brown tweede.
“Dis te goed om waar te wees. Die Amashovashova behandel my goed,” het Lange gesê.
Lange, wat oor 3 weke 37 jaar oud word, spog met 13 podiumplekke in die Amashovashova.
Hy het dit ses keer gewen, was vier keer tweede en drie keer derde.
Brown was vol lof vir die rol wat Lange en die res van sy span in sy sege gespeel het.
“Dit is nie altyd die vinnigste jaer wat ’n ren wen nie. Jy moet slim wees en weet wanneer dinge op hul dolste is om steeds die regte besluite te kan neem. Malcolm kan dit doen.
“Oor die laaste drie kilometer het my span die perfekte ‘trein’ opgestel. Toe Reinardt Janse van Rensburg (MTN-Energade) sowat 400 m van die eindstreep met sy eindpoging begin, het Malcolm aangedui dat ons hom moet laat gaan.
“Dit was die regte besluit, want Reinardt se bene het hom oor die laaste 200 m in die steek gelaat. Toe dit gebeur, het ek versnel. Malcolm was reg agter my, want as iets verkeerd sou loop, was hy in die perfekte posisie om te wen.”
Bly op hoogte van al die jongste sportnuus deur Nuus24Sport op Twitter te volg.
- Sport24