Drama ná Rafa-sege
2011-09-06 07:00
New York. – Die verdedigende kampioen in die Amerikaanse Ope, Rafael Nadal, het Sondagaand hier tydens ’n bisarre mediakonferensie op Flushing Meadows ineengesak met krampe.
Die 25-jarige Spaanse tennisspeler het ná sy sege in die derde ronde oor David Nalbandian met joernaliste gepraat toe sy gesig van die pyn vertrek en hy teruggesak het in sy stoel terwyl hy sy regterbeen vasgegryp het.
Hy het op die vloer geval agter die tafel waar hy gesit het, met mediese personeel wat ontbied is.
Talle joernaliste en TV-spanne is uit die onderhoud-vertrek gestuur. Nadal het behandeling ontvang van die fisioterapeute en ná 15 minute was hy weer op die been.
Hy het volgehou dit was slegs krampe en toe sy mediakonferensie hervat is, het hy gestaan eerder as gesit en gesê dit was baie pynlik.
Hy kom vandag teen Gilles Muller van Luxemburg te staan.
Tydens sy sege van 7-6 (7/5), 6-1, 7-5 oor Nalbandian, wat in kwaai hitte beslis is, is Nadal ook vir blase aan sy regtervoet behandel.
Die Brit Andy Murray (4de gekeur) het sy sesde agtereenvolgende oorwinning oor die Spanjaard Feliciano Lopez behaal. Die telling was 6-1, 6-4, 6-2.
In die eerste stel het Murray nie ’n enkele punt op sy afslaan afgestaan nie. Hy speel nou teen die Amerikaner Donald Young, wat die eerste keer die vierde ronde van ’n Grand Slam-toernooi gehaal het toe hy die 24ste gekeurde, Juan Ignacio Chela van Argentinië, met 7-5, 6-4, 6-3 uitgeskakel het.
Young het sy enigste vorige ontmoeting met Murray gewen. Dit was vroeër vanjaar in Indian Wells. Murray het gesê dit was in ’n stadium toe sy spel glad nie goed was nie.
Juan Martin del Potro, die kampioen hier in 2009, is in ’n marathonstryd van vier uur deur die Fransman Gilles Simon (12de) met 4-6, 7-6 (7/5), 6-2, 7-6 (7/3) verslaan.
Del Potro van Argentinië het 72 ongedwonge foute gemaak en 3 stelpunte in die 10de pot van die 4de stel verbrou.
Simon kom nou teen die 28ste gekeurde, John Isner van Amerika, te staan, wat sy landgenoot Alex Bogomolov met 7-6 (11/9), 6-4, 6-4 geklop het.
In die vroue-enkelspel het Samantha Stosur van Australië die Rus Maria Kirilenko met 6-2, 6-7 (15/17), 6-3 in 3 uur en 16 minute geklop om die kwarteindronde te haal.
Dit was die langste wedstryd in die geskiedenis van die vroue-enkelspel hier in die Amerikaanse Ope.
Die tweede gekeurde, Vera Zvonereva van Rusland, het die Duitser Sabine Lisicki met 6-2, 6-3 verslaan.
– Bly op hoogte van al die jongste sportnuus deur Nuus24Sport op Twitter te volg
- Sapa - AP