Djokovic klop Federer in laaste stryd van 2012

2012-11-13 08:19

Londen – Novak Djokovic het vanjaar se tennisseisoen op 'n hoogtepunt afgesluit toe hy Roger Federer Maandagaand in die eindstryd van die ATP-wêreldreeks geklop het.

Dit het die 25-jarige egter bloedsweet gekos om eindelik met 7-6 en 7-5 oor die wêreld se naasbeste speler te seëvier.

Sedert die Serwiër sy vyfde Grand Slam-titel in Januarie by die Australiese Ope in 'n epiese stryd van byna ses ure lank teen Rafael Nadal gewen het, moes hy regdeur die jaar aanvalle van Federer en die Brit Andy Murray afweer.

Hy het albei spelers egter die week in Londen geklop om sy eerste posisie op die wêreldranglys te verstewig.

Vir die jongste sportnuus volg Nuus24Sport op Twitter.

– Sport24