Dis Robin teen Rafael in Franse kwarteind
2011-05-31 08:59
Parys. – Rafael Nadal en Robin Soderling is oor die algemeen nie juis vriendelik met mekaar nie en dit was juis dié Sweed wat Nadal sy enigste nederlaag tot nog toe op Roland Garros toegedien het.
Verlede jaar was dit die eindstryd, maar vanjaar is dit sommer reeds in ’n kwarteindstryd dat dié twee tennisspelers mekaar om ’n plek in die halfeindronde van die Franse Ope die stryd gaan aansê.
Die loesing was in 2009 toe Nadal die viermalige verdedigende kampioen was.
Nadal, die beste speler ter wêreld en ’n vyfmalige wenner hier, het Ivan Ljubicic van Kroasië met 7-5 6-3 6-3 geklop.
Nadal probeer om Bjorn Borg se rekord van ses Franse Ope titels te ewenaar.
Sy vertoningslys op Roland Garros is tans 41-1.
Soderling, vyfde gekeur, het sonder om té veel te sweet die Fransman Gilles Simon (18de) met 6-2, 6-3, 7-6 ore aangesit.
Soderling het die afgelope twee jaar in die eindstryd van die Franse Ope gespeel.
In 2009 het hy teen Roger Federer verloor en verlede jaar teen Nadal.
Li Na (sesde gekeur) het die eerste Chinese speler geword wat die kwarteindronde van die Franse Ope haal nadat sy die Tsjeg Petra Kvitova met 2-6, 6-1, 6-3 geklop het.
Vroeër vanjaar was Li die eerste Chinese speler wat die eindstryd van ’n Grand Slam-toernooi gehaal het toe sy in die eindstryd van die Australiese Ope teen Kim Clijsters gespeel het.
Li is nie bekend vir haar vermoëns op kleibane nie, maar dit keer haar nie om hoog te mik nie.
“Ek het my wedstryd gewen, so wat moet ek sê. Ek probeer om op dieselfde vlak te speel as wat die geval in Melbourne was.
“Ek hou nie van kleibane nie, maar ek is steeds in die kwarteindronde. Vir ’n beroepspeler maak dit nie saak of jy van die baan, oppervlak of weer hou nie, jy móét net die wedstryd speel. Daar is nie ’n keuse nie.”
- Novak Djokovic het sonder enige hulp reeds onkeerbaar gelyk op pad na sy eerste titel op Roland Garros.
Nou gaan die Australiese Ope kampioen boonop ’n bykomende dag hê om te rus.
Sy teenstander in die kwarteindronde, Fabio Fognini van Italië, het hom weens ’n beseerde linkerdyspier aan die wedstryd onttrek.
Volgens Fognini was dit ’n moeilike en emosionele besluit, maar die risiko is te groot.
Djokovic het reeds 41 agtereenvolgende wedstryde sedert die begin van die seisoen gewen en benodig nog net een oorwinning om John McEnroe se rekord van 1984 te ewenaar.
Dié Serwiër se vordering gister tot in die halfeindronde sal egter nie as deel van dié segetog tel nie.
Dié naasbeste speler ter wêreld sal dus Sondag die trofee moet verower as hy dié rekord wil verbeter.
Vir die jongste sportnuus volg Nuus24Sport op Twitter.
- SAPA