Dis LJ teen Yank-blits in Katar
2011-05-05 07:57
Pretoria - Dit is Vrydag in Doha, Katar, ’n geval van blits teen blits wanneer die Suid-Afrikaner LJ van Zyl en die Amerikaner Bershawn Jackson mekaar die stryd in die 400 m-hekkies op die eerste Diamantliga-atletiekbyeenkoms van die jaar aansê.
Van Zyl spog tot dusver vanjaar met die twee vinnigste tye in dié nommer, naamlik 47.66 en 47.73 sekondes. Verlede jaar was Jackson die vinnigste met ’n tyd van 47.32.
As statistieke in ag geneem word, moet Jackson die gunsteling wees. Van die 31 keer dat hulle met mekaar meegeding het, het die Amerikaner 23 keer vir Van Zyl weggehardloop.
Jackson het sedert 2006 twee keer in Doha teenoor Van Zyl se een keer gewen.
Maar syfers vertel nie altyd die volle verhaal nie.
Dit is 'n nuwe Van Zyl wat deesdae in die wegspringblokke sak. Die feit dat hy reeds twee keer vanjaar tye vinniger as 48 sekondes opgestel het, getuig daarvan.
Dit is nie enige atleet wat sulke tye kan hardloop nie. Sedert 2006 kon net 10 atlete die 400 hekkies vinniger as 48 sekondes aflê.
Jackson is ’n atleet wat ’n gewoonte daarvan maak. Verlede jaar het hy dit ses keer reggekry en van 2006 tot 2009 vier keer.
Kerron Clement van Amerika (sewe keer), sy landgenoot Angelo Taylor (vier keer) en Van Zyl en die Griek Periklis Iakovakis (albei drie keer) is die enigste ander atlete wat sedert 2006 meer as een keer tye vinniger as 48 sekondes kon opstel.
Van Zyl sien uit daarna om sy tweestryd met Jackson te hervat. “As jy teen Bershawn deelneem, is dit feitlik ’n uitgemaakte saak dat dit ’n goeie wedloop gaan wees, want hy ken net een manier om te hardloop en dit is voluit. Maar ek is reg vir hom. Ons sal sake oor die hekkies uitspook.”
Van Zyl was huiwerig om voorspellings oor tye te waag. “Natuurlik sal ek graag nog ’n vinnige tyd wil hardloop, maar ons sal maar sien wat gebeur.”
Hennie Kotzé, afrigter, maan dat Van Zyl se ondersteuners nie kan verwag dat hy elke keer vinniger as 48 sekondes hardloop as hy deelneem nie.
Vrydag se wedloop kan maklik daarop afstuur dat twee honde oor ’n been baklei en ’n derde loop daarmee weg.
Cornel Fredericks kan dalk ’n groot verrassing lewer. Hy spog tot dusver op twee en drie na met die vinnigste tye, naamlik 48.14 en 48.95.
Hy is ongetwyfeld die hekkiesatleet wat die afgelope drie jaar die meeste verbeter het.
In 2008 was sy beste tyd 50.39, in 2009 was dit 49.93, verlede jaar 48.79 en nou is dit 48.14.
Die Suid-Afrikaner Robert Oosthuizen sal in die spiesgooi in aksie wees.
Vir die jongste sportnuus volg Nuus24Sport op Twitter.
- Sport24