Dinara Safina pak tennisraket weg
2011-10-07 14:36
Moskou - Die voormalige nr.1-vrouespeler Dinara Safina, het haar uittrede uit tennis aangekondig, het die speler se ouer broer, Marat Safin, Vrydag aan mediabronne gesê.
"Dinara het besluit om haar loopbaan te beeïndig," het haar broer gesê. Safin het gesê langdurige rugpyn is die hoofrede vir sy suster se besluit om op te hou speel.
"Sy is gesond en voel elke dag goed, maar die rugbesering beteken dat sy net doodeenvoudig nie meer professionele tennis kan speel nie."
Safina se laaste wedstryd was vanjaar in April in Madrid toe sy haar ronde 32-wedstryd teen Duitsland se Julia Goerges verloor het.
Die 25-jarige, wat silwer by die Olimpiese Spele in 2008 in Beijing gewen het, het in drie Grand Slam-eindwedstryde gespeel en 12 enkel- en nege dubbelstitels tydens haar loopbaan verower.
Sy het op 20 April 2009 die eerste plek op die ranglys beklee.
Vir die jongste sportnuus volg Nuus24Sport op Twitter.
– Sport24