Delhi-stadions bly leeg
2010-10-04 18:20
Nieu-Delhi - Regoor Nieu-Delhi het helder plakkate mense gepleit: “Kom uit en speel,” maar Maandag het hierdie wemelende stad se inwoners gekies om tuis te bly soos ‘n golf van onverskilligheid die Statebondspele begroet het.
Op die openingsdag is wedstryde gespeel in stadions wat spookagtig leeg was – ‘n kommerwekkende prentjie vir organiseerders wat gehoop het Sondag se wyd-toegejuigde openingseremonie het die probleme van die opbou tot die spele ter ruste gelê.
“Australië 76, toeskouers 58,” het ‘n opskrif op die aanlyn-weergawe van die Sidney Morning Herald gespot ná die eerste wedstryd in die netbalkompetisie in die Thyagaraj-sportkompleks, wat tot 4 500 toeskouers kan huisves.
“Australië se netbalspelers het meer doele aangeteken as wat daar toeskouers was,” het hul verslaggewer geskryf.
By die Major Dhyan Chand-hokkiestadion, wat 16 000 toeskouers kan huisves, kon nie eens Indië se vrouespan, wat in 2006 in Melbourne die silwer medalje gewen het, toeskouers trek nie. Slegs 200 mense het die wedstryd bygewoon.
Indië het dapper gebly in die aangesig van dié onverskilligheid.
“Ek is baie gelukkig met die publiek se ondersteuning en die manier waarop hul agter ons staan. Dit is altyd spesiaal om voor ‘n mens se tuisskare te speel,” het die speller Surinder Kaur gesê.
Dinge het net so bleek gelyk by die Siri Fort-sportkompleks, waar die eerste ronde van die muurbaltoernooi plaasgevind het. Dié kompleks kan 3 500 mense huisves, maar bywoningsyfers was hier ook baie laag.
- Volg Nuus24 op Twitter
- Sapa - AFP