David Beckham skuif dalk na Australië

2012-11-16 13:26

Londen – David Beckham se bestuurspan het Vrydag bewerings deur Australië se sokkervereniging (FFA) ontken dat die LA Galaxy-ster tot 'n leenooreenkoms ingestem het.

Die FFA beweer dat Beckham (37) tans in samesprekings is met Australiese klubs oor 'n leenooreenkoms om in die A-liga te speel, maar 'n verteenwoordiger vir die voormalige Engeland-kaptein het gesê daar steek geen waarheid in die berigte nie.

"Daar is altyd baie belangstelling in klubs van regoor die wêreld om David as 'n speler te teken," het die woordvoerder Vrydag aan Sky Sports News gesê.

"David is egter heeltemal gefokus op die MLS [Amerikaanse sokkerliga] se uitspeelrondes en om nog 'n titel met die Galaxy te wen."

Die FFA het vroeër berig dat Beckham se bestuurspan sy dienste vir die huidige seisoen aangebied het.

Volgens berigte wil hy glo 10 wedstryde in Australië speel sodra die MLS-seisoen oor twee weke eindig.

Beckham se voormalige Manchester United-spanmaat en 'n oud-doelwagter vir Australië Mark Bosnich het ook bevestig dat daar "definitiewe kontak" oor 'n moontlik skuif na Australië was.

"David Beckham se verteenwoordigers het belangstelling getoon. Natuurlik is die idee aan die FFA voorgestel," het Bosnich in 'n onderhoud aan Sky News gesê.

Lees verder.

Vir die jongste sportnuus volg Nuus24Sport op Twitter.

- AFP