DCM slaan slag by Boland-toer
2011-03-09 09:11
Paarl - Die eerste skof van die vierdaagse Tour de Boland het Dinsdag groot sukses vir die DCM-fietsryspan opgelewer.
Nie net het die DCM-jaer Herman Fouché dié skof oor 146 km in 3 uur, 35 minute en 35 sekondes gewen nie. Twee van sy spanmaats, Darren Lill en Ian McLeod, was saam met hom in die wegbreek-groep van 10 jaers wat sowat 2 minute voor die bondel eerste oor die wenstreep gejaag het.
Dié trio is nou reeds groot gunstelinge om die algehele titel te wen.
“Alles het vandag perfek vir ons verloop,” het Fouché gesê. “Bainskloofpas was gelukkig nie te steil of te taai nie en my spanmaats het my mooi bygestaan om seker te maak ek bly by hulle. Ek dink nogal dit was snaaks dat ons op die afdraand weggebreek het. Drie van ons was in dié groep en dit was so perfek.
“Ek het die laaste 15 km nie meer gehelp om die pas aan te gee nie, want Darren het gesê ek moet my spaar vir die naelrit.”
Christoff van Heerden (MTN-Qhubeka) en Johann Rabie (Bonitas) was onderskeidelik tweede en derde in die naelrit.
Van Heerden was wel tweede, maar MTN-Qhubeka se voorste jaers, Daryl Impey en Dennis van Niekerk, het nie beïndruk nie en is nou meer as 2 minute agter die voorlopers.
Die voorste o.23-jaer is Christiaan Kriek. Burry Stander (Specialized) is die voorloper in die bobaas van die berge-kompetisie.
Cherise Taylor (4:12:00) was die eerste vrou oor die wenstreep.
Bly op hoogte van al die jongste sportnuus deur Nuus24Sport op Twitter te volg.
- Sport24