DA blameer ASA oor Caster-sage
2009-09-11 11:41
Kaapstad - Donald Lee, DA-skaduminister van sport en ontspanning, gaan Atletiek Suid-Afrika (ASA) voor die parlementêre portfeuljekomitee daag omdat die sportliggaam nie Caster Semenya se regte beskerm het nie.
"Daar is geen twyfel nie dat ASA en die IAAF Semeya se reg op waardigheid geskend het. Die wyse waarop die hele saak behandel is, is kil en onsensitief, en onbevoegdheid is duidelik die oorsaak hiervan," het Lee in 'n verklaring gesê.
"Elke Suid-Afrikaner moet homself vra 'wat as dit ek was?' Slegs dán kan 'n mens jou indink hoe wreed Semenya se waardigheid aangetas is."
Lee het gesê Semenya het niks om oor sleg te voel nie.
"Die manier hoe sy die hele storie hanteer het, is baie voorbeeldig."
"Ons moet beskaamd staan dat 'n openbare liggaam wat aangestel is om atletiek in die land te bevorder, toegelaat het dat die hele storie so handuit ruk. Dit is ten koste van iemand se grondwetlike regte."
Lee het gesê die DA sal veg dat Semenya en die publiek van Suid-Afrika die verskoning kry wat hulle verdien.
– Sapa