Sanders se vriend hoop skieters word gevang
2012-09-23 22:03
Pretoria – Die bokslegende Corrie Sanders se jarelange vriend Kallie Knoetze het gesê hy hoop die skieters word binnekort gevang.
"Die regering, die mense en die polisie sal iets doen en ek is seker dat die misdadigers binne 'n week vasgetrek sal word."
Knoetze het gesê Suid-Afrika se beeld word deur 'n paar misdadigers geskaad.
Die voormalige swaargewig-bokskampioen was 47 jaar oud.
Sanders se eksvrou, Sunette, het aan Eyewitness News gesê Corrie was 'n wonderlike pa en dat sy kinders hom as 'n held beskou.
"Hy het gesterf toe hy sy dogter beskerm het; anders sou die koeëls haar tref.
"Hy het sy kinders aangemoedig. Hy het nie altyd van hulle verwag om te wen nie, en wanneer hulle verloor was hy altyd daar om hulle aan te moedig om beter te doen."
Ure ná Sanders se dood het familie en vriende by sy eksvrou se huis in Akasia, noord van Pretoria, byeengekom.
Sunette het gesê dit is ontstellend dat Corrie nie sy kinders se 21ste verjaardae sal sien nie.
"Ons het 'n jong man se 21ste verjaardag gevier en almal was gelukkig. Daardie mense het gekom en 'n pa vermoor."
Sanders is dood nadat hy tydens 'n skietery by 'n restaurant buite Brits, waar hy sy kleinneef se 21ste verjaardagvieringe bygewoon het, het die polisie Sondag gesê.
Drie mans het Saterdagaand by die restaurant ingestorm en wild begin skiet. Sanders is in die maag en hand gewond toe hy voor sy dogter ingespring het om haar te beskerm.
Sanders het in 2008, met 'n indrukwekkende rekord van 42 oorwinnings en slegs vier nederlae, uitgetree.
– Lees meer hier
– Volg Nuus24Sport op Twitter
