Corrie Sanders het 'as 'n held' gesterf
2012-09-23 15:45
Johannesburg – Corrie Sanders, die voormalige swaargewig-bokskampioen, het as 'n held gesterf, het sy eksvrou, Sunette, aan Talk Radio 702 gesê.
"Ek dink hy het as 'n held gesterf," het sy gesê.
"Hy het net sy dogter beskerm omdat hulle geskiet het. Twee koeëls het hom getref, een in die arm en die ander een in 'n gedeelte van sy maag."
Sanders is dood tydens 'n skietery by 'n restaurant buite Brits, waar hy sy kleinneef se 21ste verjaardagvieringe bygewoon het, het die polisie Sondag gesê.
Drie mans het Saterdagaand by die restaurant ingestorm en wild begin skiet. Sanders is in die maag en hand gewond toe hy voor sy dogter ingespring het om haar te beskerm.
Die 46-jarige het Sondagoggend weens sy beserings beswyk.
"Michael (Sanders se broer) se seun het sy 21ste verjaardag gevier. Corrie was ook daar toe die rowers gekom het," het Johan Bejager aan Sapa gesê.
Sanders het in 2008, met 'n indrukwekkende rekord van 42 oorwinnings en slegs vier nederlae, uitgetree.
– Volg Nuus24Sport op Twitter
- AFP
