Contador word vrygespreek
2011-02-16 13:37
Madrid - In 'n dramatiese ommekeer het die Spaanse fietsryvereniging die driemalige Tour de France-kampioen, Alberto Contador, vrygespreek nadat hy vir 'n verbode middel positief getoets het.
Contador, se regsverteenwoordiger het gesê dié fietsryvereniging aanvaar die Spanjaard se verduideliking dat besmette vleis die oorsaak is vir sy positiewe toets.
Die fietsjaer het in Augustus verlede jaar aangekondig dat 'n klein hoeveelheid van die verbode middel clenbuterol in sy bloed gevind is tydens 'n opkikkertoets by die 2010 Tour de France.
"Ek is verlig en verheug oor die uitspraak. Die afgelope ses maande was baie stresvol," het Contador gesê nadat die Spaanse fietsryvereniging se finale uitspraak aangekondig is.
Dieselfde fietsryvereniging het Contador verlede maand (Januarie) geskors nadat dit voorstelle van 'n kompetisie komitee aanvaar het om hom vir 12 maande te skors.
Contador se nuwe span, Saxo Bank, het in 'n persverklaring gesê hy sal reeds vandag (Woensdag) weer die pedale trap wanneer die vyf dae lange Algarve-fietstoer in Portugal afskop.
Saxo Bank het bygevoeg dat die Spaanse fietsryvereniging die besluit gemaak het op grond van bewyse in die saak en Contador se verduideliking dat hy nie doelbewus die middel ingeneem het nie.
Maar die Internasionale fietsryvereniging (UCI) en Wada (wêreldliggaam teen verbode middels), het 'n maand tyd om in die hof vir arbitrasie in sport, teen die besluit te appelleer.
Bly op hoogte van al die jongste sportnuus deur Nuus24Sport op Twitter te volg.
- Sport24