Contador op verbode middel: Besmette vleis nie rede
2010-11-17 16:08
Parys - 'n Ondersoek deur die wêreldliggaam teen verbode middels (Wada) kon nie bewys dat besmette vleis die rede vir Alberto Contador se positiewe toets vir verbode middels was nie.
Die driemalige Tour de France-kampioen is in September tydelik geskors nadat hy positief getoets het vir die verbode middel clenbuterol.
Die Spanjaard het besmette vleis die skuld gegee. Maar die verslag het gesê kenners het die slaghuis in die noorde van Spanje, waar die vleis gekoop is, besoek en kon geen bewyse van clenbuterol in enige produkte kry nie.
"Geen van die ondersoeke en geen toetse op vleisprodukte het 'n positiewe toets vir clenbuterol opgelewer nie. Clenbuterol is 'n verbode middel wat aan slagdiere toegedien word om hulle vinniger vet te maak," het die El Pais koerant die verslag aangehaal.
In Wada se verslag word 'n studie deur die Europese Unie in 2008 ook aangehaal waar 300 000 vleisprodukte getoets is. Daar is slegs in een van die 300 000 produkte clenbuterol gevind.
Contador het gedreig om sy uittrede aan te kondig indien hy vir twee jaar weens verbode middels geskors sou word.
Bly op hoogte van al die jongste sportnuus deur Nuus24Sport op Twitter te volg.
- Sport24