Contador geskors, verloor Tour de France-titel

2012-02-06 13:43

Lausanne – Die Spaanse fietsryvereniging het Maandag bevestig dat die hof vir arbitrasie in sport (CAS) die Tour de France-kampioen Alberto Contador vir twee jaar geskors het. Contador is ook die Tour de France-titel wat hy in 2010 gewen het, kwyt.

CAS se beslissing volg ná 'n uitgerekte proses waarin die Spanjaard besmette vleis die skuld gegee het vir sy positiewe toets vir clenbuteril tydens die 2010 Tour de France.

Die Internasionale fietsryvereniging (UCI) en Wada (wêreldliggaam teen verbode middels), het verlede jaar hul appèl teen die Spaanse fietsryverening se besluit om Contador vry te spreek gewen, waarna CAS die opkikker-saak aangehoor het.

Die skorsing is terugwerkend wat beteken dat Contador al die titels sal verloor wat hy die afgelope twee jaar gewen het. Andy Schleck is die nuwe Tour-kampioen terwyl Michele Scarponi as die wenner van die Giro d'Italia gekroon sal word.

Contador se skorsing eindig op 5 Augustus, dus sal hy later vanjaar aan die Vuelta-fietstoer kan deelneem.

Dit is slegs die tweede keer in die geskiedenis van die Tour de France dat 'n wenner gediskwalifiseer is vir 'n positiewe opkikkertoets.

Die 2006-wenner Floyd Landis was die eerste jaer wat sy titel weens 'n positiewe toets verloor het.

Vir die jongste sportnuus volg Nuus24Sport op Twitter.

- AFP