Comrades-wenner se B-monster ook positief

2012-07-13 11:06

Kaapstad – Die Suid-Afrikaanse Instituut vir Dwelmvrye Sport (SAIDS) het Vrydag in 'n verklaring gesê 'n tweede toets het die Comrades-wenner Ludwick Mamabolo se positiewe toets vir die verbode stimulant metielheksaneamien bevestig.

"Daar sal nou ooreengekom word op 'n datum waar Mamabolo die kans sal kry om sy saak voor 'n onafhanklike verhoor te stel," het SAIDS se uitvoerende hoof, Khalid Galant, gesê.

Galant het verduidelik dat die tweede toets, wat 'n 30 ml-monster van die atleet se oorspronklike urienemonster is, 'n toets is om die A-monster te bevestig.

"Die meeste atlete wat vir die gebruik van opkikkers aangekla word, laat vaar hul reg om die B-monster te toets omdat dit meer tyd byvoeg tot die proses om met 'n verhoor te begin," het hy gesê.

Die 35-jarige Mamabolo was die eerste Suid-Afrikaner in sewe jaar om die Comrades van 89 km op die roete van Pietermaritzburg na Durban te wen.

Volg Nuus24Sport op Twitter.

- SAPA