Chuene ‘red wêreld, maar SA kruisig’ hom
2011-06-01 08:14
Kaapstad - “Ek het die wêreld gered, maar word in my eie land gekruisig.”
Só het Leonard Chuene, afgedankte voorsitter van Atletiek Suid-Afrika (ASA), Dinsdag sy lot in die parlement bekla.
Dít nadat die ANC daarop aangedring het dat Chuene se weergawe van die gebeure wat tot sy skorsing vroeër vanjaar gelei het, aangehoor word.
Chuene is in Februarie deur die Suid-Afrikaanse Sportkonfederasie en Olimpiese Komitee (Saskok) vir sewe jaar van alle sport geskors. Saskok het hom skuldig bevind aan klagte van onder meer geldelike vergrype en wanbestuur.
Chuene het Dinsdag aangevoer dit is danksy hom dat die internasionale atletiekwêreld gedwing is om regulasies in te stel oor hoe om gevalle te hanteer van atlete soos Caster Semenya, wie se geslag in twyfel getrek word.
Chuene se teenwoordigheid by die komiteevergadering gisteroggend het eers ’n ligte opskudding veroorsaak toe die DA beswaar gemaak het daarteen.
Donald Lee, DA-LP, het gesê hy is “ongemaklik” met Chuene daar. “Dié man is skuldig bevind. Hoe kan die indruk geskep word dat ons Saskok en die nuwe bestuur van ASA in die rug steek en ondermyn?”
Lee en nog ’n lid van die DA, Japie van der Linde, het uiteindelik die vergadering verlaat nadat die voorsitter van die sportkomitee, mnr. Butana Komphela, te kenne gegee het hy gaan hulle nie probeer oortuig om te bly nie.
Dit is wyd bekend Komphela en Saskok sit nie langs dieselfde vuur nie. Chuene het gister beweer die debakel rondom Semenya is gebruik om hom en ander voormalige ASA-bestuurslede by te kom.
Saskok het vinnig teen hom opgetree, maar dié liggaam is stil oor dispute in ander sportfederasies soos sokker en krieket.
Komphela het Chuene aangepor om sy indrukke te gee van hoe die Semenya-saak aan die media gelek is. “Ek dink u is iemand wat die Grondwet van die land verstaan. Die Grondwet diskrimineer nie op grond van ras of geslag nie,” het Komphela gesê.
Vir die jongste sportnuus volg Nuus24Sport op Twitter.
- Sport24