Chuene moet tjaila!
2009-11-05 15:14
Johannesburg - Leonard Chuene is deur Suid-Afrika se Sportkonfederasie en Olimpiese Komitee (Sascoc) geskors, op dieselfde dag wat Atletiek Suid-Afrika (ASA) uiteindelik besluit het om jammer te sê vir hul aandeel in die Semenya-geslagstoets debakel.
Die raad van ASA en ál sy lede is ook deur Sascoc in die pad gesteek, hangende die uitslag van 'n disiplinêre ondersoek.
ASA het “onvoorwaardelik” om verskoning gevra vir die manier waarop die beheerliggaam opgetree het tydens Caster Semenya se geslagstoetsery.
“ASA waardeer die ANC se siening oor die saak, en verwelkom sonder voorbehoud enige bevindings en voorstelle van die taakspan," het ASA in ‘n verklaring gesê.
"Gevolglik wil die ASA graag vir Caster Semenya en haar familie in die openbaar verskoning vra, asook die president van die land en alle Suid-Afrikaners vir die wyse waarop die hele geslagstoetsery hanteer is.”
ASA het ook gesê hulle is bereid om saam te werk met enige owerheid wat die situasie verder wil neem.
Chuene het vroeër onverskoning gevra dat hy oor die geslagstoetsery gelieg het, maar gesê dit was om Semenya te beskerm.
- Sapa