Chuene amptelik sy werk kwyt
2011-02-18 13:57
Johannesburg - Die voormalige hoof van Atletiek Suid-Afrika (ASA), Leonard Chuene, is Vrydag amptelik in die pad gesteek saam met twee van sy kollegas.
Die Suid-Afrikaanse Sportkonfederasie en Olimpiese Komitee (Saskok) het in 'n verklaring gesê dat Chuene, sowel as die voormalige adjunkvoorsitter van ASA, Kakata Maponyane, en raadslid Simon Dlamini, afgedank is.
Chuene is vir sewe jaar uit betrokkenheid by alle sportsoorte wat deur Saskok beheer word, verban.
Maponyane het 'n soortgelyke straf ontvang, maar vir 'n periode van vyf jaar, en Dlamini vir drie jaar.
Adv. Norman Arendse, voorsitter van die dissiplinêre komitee, het bevind dat Chuene, Maponyane en Dlamini onmiddellik hulle poste op ASA se raad moet verloor. Dié stap volg 15 maande ná hulle deur Saskok geskors is.
"As mnr. Chuene sy terugkeer na atletiek wil maak voor dié periode verby is sal daar van hom vereis word om met 'n goeie rede vorendag te kom," het die verklaring gelui.
Chuene sal aan drie voorwaardes moet voldoen as hy weer tot atletiek wil terugkeer: Die regskoste wat teen hom in die saak aangegaan is moet betaal word, hy moet die geld terugbetaal wat hy op ongrondwetlike wyse van die konfederasie bekom het, en hy moet berou toon vir sy dade.
Chuene, Maponyane en Dlamini het vroeër geweier om teen hulle skorsing te appelleer omdat hulle nie die wettigheid van die dissiplinêre komitee erken het nie.
- Volg Nuus24Sport op Twitter.