China taai leerskool vir SA hokkie
2010-06-30 10:00
Kaapstad - Ná ’n uitmergelende toer van 12 wedstryde teen China, is die nuwe afrigter van die Suid-Afrikaanse vrouehokkiespan, Giles Bonnet, meer as ooit bewus van die reuse-taak wat op hom wag.
Die Proteas het nie een van die dosyn wedstryde teen China (nr. 3 op die wêreldranglys) gewen nie.
Bonnet het egter ’n lys doelwitte – wat nie die wen van wedstryde ingesluit het nie – gestel vir dié toer en dit is wat vir hom belangrik is.
“Nie al die doelwitte is bereik nie. Die proses is egter begin en dít is baie belangrik,” het Bonnet ná die span se terugkeer gesê.
Bonnet het sewe aspekte geïdentifiseer waaraan sy spelers moet werk.
Dit is tegniese vaardighede, kondisionering, besluitneming, verantwoordelikheid op die veld, spesialis-vaardighede, strukture en doelbal-situasies (soos korthoeke).
Hy was veral omgekrap oor die swak fisieke kondisionering van die spelers.
Dit is egter nie verrassend nie, aangesien hulle geen aandag of kondisioneringsprogramme gekry het waarvolgens hulle kon werk nie sedert die Suid-Afrikaanse Hokkievereniging einde verlede jaar die voormalige afrigter Jenny King skielik afgedank het.
Bonnet het die kans gehad om die groep te leer ken en hy is baie optimisties oor die spelers tot sy beskikking.
“Die groep in China was vasbeslote om hard te werk en die gees om te alle tye mededingend te bly, was verblydend.
“As die groep sy strukture en individuele vaardighede in dié strukture verbeter, sal die mededingende instink tot goeie vertonings en seges lei.”
Met die oog op die toekoms is Bonnet opgewonde dat die spelers bereid is om aan nuwe idees blootgestel te word.
“Die spelers het beslis gegroei in die drie weke in China.
Dit was bemoedigend om te sien hoe die span begin het om die strukture waaroor ons gepraat het, te implementeer.
“In die laaste drie wedstryde teen China het die span meer mededingend geraak danksy die toepassing van die nuwe strukture. Dit was baie positief.”
Bonnet gaan nog twee oefenkampe hê ná die nasionale toernooi van 20 tot 24 Julie in Oos-Londen voor die Statebondspele in Oktober in Indië.
Bly op hoogte van al die jongste sportnuus deur Nuus24Sport op Twitter te volg.
- Sport24