Chaos oorskadu marathon in Soweto
2011-11-07 08:00
Pretoria. – Mamorallo Tjoka van Lesotho het Sondag die Soweto-marathon vir vroue in ’n nuwe roete-rekordtyd van 2 uur, 43 minute en 40 sekondes gewen.
Haar wentyd is 14 sekondes vinniger as die rekord wat René Kalmer twee jaar gelede opgestel het.
Suid-Afrika se Michael Mazibuko het die marathon vir mans in 2:19:04 gewen.
Ongelukkig sal vanjaar se Soweto-marathon onthou word vir die chaos by die wegspring en oor die eerste paar kilometer.
Dit het daartoe gelei dat Irvette van Blerk, een van die gunstelinge, onderstebo gehardloop is voordat sy ’n enkele tree kon gee.
Volgens Van Blerk was dit ’n skrikwekkende ervaring.
“Ek dog nog ek hardloop, toe lê ek op die grond en die een atleet ná die ander hardloop bo oor my en trap my raak.
“Dit is verstommend dat niemand net wou stop om my op te help nie.
“Ek het gevoel soos ’n klein miertjie wat onder die voete van honderde aanstormende olifante beland het.”
Van Blerk het haar knie sodanig beseer dat sy ná 38 km die handdoek ingegooi het.
Sy het die R20 wat sy by haar gehad het, gebruik om ’n taxi te betaal om haar na die eindpunt te neem.
Kalmer, wat die vrouewedloop oor 10 km gewen het, sê uit ’n vroue-oogpunt het die wegspring op mishandeling neergekom.
“Dit was belaglik dat die atlete wat aan die 10 km en die marathon deelgeneem het saam moes wegspring. Ek dink ook dit sou beter gewees het as ons vroue afsonderlik kon wegspring.
“Ek kan ook nie verstaan waarom die afsitter sy pistool vier minute vroeër as wat hy moes afgevuur het nie.
“Ek het gedink daar gaan ’n minuut se stilte wees as ’n huldeblyk aan die vyf atlete wat doodgery is, toe begin ons al hardloop.
“Mense wat nog op pad was na die wegspring het sommer voor ons ingespring en begin saamdraf.
“Ná 400 m moes die atlete wat aan die 10 km deelneem, links draai en die marathon-atlete regs.
“Ongelukkig het die beamptes die 10 km-atlete op die marathon- roete uitgestuur.
“Daar was ook nêrens kilometer-borde nie, so ek het geen idee gehad of ek wel op die regte roete was of teen watter pas ek hardloop nie.
“Ek dink Atletiek Suid-Afrika moet die volgende keer ’n organiseerder van een van die groot stad-marathons kry om hulle te help.
Die Soweto-marathon is Suid- Afrika se grootste en gewildste wedloop en het soveel geskiedenis. Daarom kan dit nie bekostig word dat soveel chaos plaasvind nie.”
Moses Mosuhli was tweede in die mans-marathon in ’n tyd van 2:19:05. Lebenya Nkoka was derde in 2:19:34.
Brittanje se Emma Gooderham was tweede (2:43:57) in die vroue-wedloop en Rusland se Nina Podnebesnova derde (2:48:05).
Vir die jongste sportnuus volg Nuus24Sport op Twitter.
– Sport24