Chani steeds op wenpad in Sydney
2012-01-10 10:10
Bloemfontein – Chani Scheepers van Suid-Afrika sal die Franse Ope-kampioen, Na Li van China, in die tweede ronde van Sydney se jaarlikse tennistoernooi pak.
Scheepers het ’n medekwalifiseerder, Melinda Czink van Hongarye, in die eerste ronde met 6-4, 6-2 uitgeskakel.
Die vierde gekeurde Li het Rusland se Ekaterina Makarova in net 66 minute met 6-0, 6-3 afgeransel.
Li het verlede jaar die eindstryd van die Australiese Ope gehaal waarna sy toe met die volgende Grand Slam-toernooi die trofee op Roland Garros gelig het.
Li het Scheepers in hul enigste kragmeting tot dusver in 2010 op Wimbledon met 7-6 (5), 6-2 geklop.
Scheepers het reeds vier wedstryde agter die blad in Sydney nadat sy verlede week in Brisbane in die eerste ronde deur Serena Williams getroef is.
Scheepers het daarna een plek na 39ste op die ranglys uitgesak.
Intussen het twee van die gekeurdes in die eerste ronde in Sydney gesneuwel.
Die huidige kampioen van die Amerikaanse Ope, Sam Stosur van Australië, was een van die gekeurdes wat nie die eerste ronde oorleef het nie.
Italië se Francesca Schiavone, wat haar in 2010 se eindstryd van die Franse Ope geklop het, het die vyfde gekeurde plaaslike gunsteling met 6-2, 6-4 in die eerste ronde huis toe gestuur.
Die ander gekeurde wat haar tasse moes pak, is die sesde gekeurde, Vera Zvonareva, wat deur haar Russiese landgenoot Svetlana Kuznetsova met 6-1, 6-2 uitgeskakel is.
Die twee topgekeurdes Caroline Wozniacki van Denemarke en Tsjeggië se Petra Kvitova speel na loslootjies in die eerste ronde nou onderskeidelik teen Dominika Cibulkova van Slowakye en Alex Dulgheru van Roemenië.
Kvitova kan Wozniacki onttroon as die wêreld se voorste vrouespeler as sy dié toernooi wen.
Suid-Afrika se Kevin Anderson begin sy opmars na die Aussie-ope teen die Franse kwalifiseerder Adrian Mannarino in die eerste ronde van die Heineken-ope in Auckland.
Anderson, steeds 32ste op die ranglys, is vyfde gekeur vir die toernooi in Nieu-Seeland.
– Vir die jongste sportnuus volg Nuus24Sport op Twitter.
– Sport24