Chad le Clos se pa skik in aanrandingsaak

2012-09-07 13:02

Johannesburg – Die pa van Suid-Afrika se Olimpiese swemkampioen Chad Le Clos moes R18 000 betaal om 'n aanrandingsaak te skik, het die Star-koerant Vrydag berig.

Bert le Clos moes skade sowel as regskostes betaal as gevolg van 'n aanranding by 'n kroeg in April 2010.

Die slagoffer van die beweerde aanranding is Richard Simpson, 'n apteker van Durban.

Die saak sou Donderdag by die siviele hof in Pinetown aangehoor word, maar Simpson se prokureur het gesê sy kliënt het geskik.

Kriminele aanklagte is teen Le Clos sr. gelê, maar hy is nie skuldig bevind nie.

Simpson het toe 'n siviele saak teen hom gemaak en in Desember is 'n verstekvonnis aan hom toegestaan.

Le Clos het aan die hof gesê hy kan nie betaal nie, omdat hy werkloos is en nie geld van sy eie het nie," het die koerant berig.

Die hof wou beslag lê op sy eiendom, maar Le Clos besit geen eiendom nie.

Volg Nuus24 op Twitter.