Cavendish, Hushovd gestraf oor stoeiery
2011-07-05 10:55
Redon, Frankryk – Organiseerders van die Tour de France het die Brit Mark Cavendish en Thor Hushovd van Noorweë se punte vir die derde skof weggevat nadat hulle in 'n stoeiery betrokke was.
Cavendish, 'n vyftienmalige skofwenner, het Hushovd met sy kop gestamp toe die jaers in posisie wou kom vir die naelrit na die eindstreep.
Maandag se derde skof oor 191 km is in 4 uur 40 minute en 21 sekondes deur Tyler Farrar van Amerika gewen.
Na afloop van die skof het die Tour de France se direkteur, Jean-Francois Pescheux, gesê albei jaers is skuldig aan 'n "ernstige oortreding" en daarom het hulle hul punte verloor.
"Eerstens het Hushovd sy lyn verlaat en toe het Cavendish homself daar ingewurm. Dit is 'n ernstige oortreding en ons kan dit nie toelaat nie."
"As ons dit in Dinsdag se naelrit toelaat kan 'n klomp jaers dalk val en dan gaan mense vra 'hoekom ons nie opgetree het nie'," het Pescheux verduidelik.
Hushovd, wat tans die geeltrui dra na sy span Garmin-Cervelo se oorwinning in Sondag se spantydtoets, het 'n groot rol gespeel in sy Amerikaanse spanmaat Farrar se eerste skofoorwinning by die Tour de France.
Die Noorweër het later oor die voorval met Cavendish geskerts: "Ek wou net bietjie van my sonbrandroom aan hom (Cavendish) afsmeer."
Vir die jongste sportnuus volg Nuus24Sport op Twitter.
– Sport24