Caster vra om te hardloop
2010-03-28 13:13
Johan van Wyk
Caster Semenya het Atletiek Suid-Afrika (ASA) versoek om haar oormôre in Stellenbosch aan die Geelbladsye-byeenkoms te laat deelneem?… en ASA sit hande in die hare oor dié aansoek.
Ray Mali, tussentydse president van ASA, het gister aan Rapport gesê: “Ek het Vrydag met die Internasionale Vereniging van Atletiekfederasies (IAAF) oor dié versoek gepraat. Hul antwoord was ’n teenversoek, dat Caster nie moet deelneem totdat die IAAF-ondersoek na haar afgehandel is nie.
“Aan my is gesê dié ondersoek sal ‘spoedig’ afgehandel wees. Ek praat weer Maandag (môre) met die IAAF. Op hierdie oomblik is ons standpunt dat ons nie teen dié IAAF-versoek wil gaan totdat uitspraak oor haar toekoms gegee is nie.”
Rapport verneem egter uit ’n ander bron in die binnekringe van ASA dat dié liggaam se raad gister Caster se versoek “met deernis” gehanteer het.
ASA is glo selfs gewaarsku dat haar menseregte aangetas kan word indien sy nie mag deelneem terwyl die IAAF-ondersoek nog hangende is nie.
Aan Rapport is gesê sy mág Dinsdag “onder protes” deelneem – én dat haar vliegtuigkaartjie na Stellenbosch “inderdaad reeds bespreek is”.
- Rapport