Caster-sage vertraag besluit
2010-02-16 10:57
Sportredaksie
Pretoria – Die omstredenheid rondom Caster Semenya en haar oorwinning in die 800 m op verlede jaar se Wêreldbyeenkoms in Berlyn het daartoe gelei dat die Suid-Afrikaanse Vereniging van Atletiekstatistici (SAAS) besluit het om nie ’n vroue-atleet van die jaar te kies nie.
Die besluit oor wie die Harry Beinart-toekenning vir die beste atletiekprestasie gaan ontvang, is ook uitgestel.
Dié eerbewyse sal gefinaliseer word sodra die Internasionale Vereniging van Atletiekfederasies (IAAF) sy besluit oor die toekoms van Semenya se atletiekloopbaan bekend maak.
Mbulaeni Mulaudzi is as Suid-Afrika se mansatleet van die jaar gekies. Hy het op die Wêreldbyeenkoms die 800?m gewen en was aan die einde van die jaar derde op die wêreldlys.
Die ander vier mans wat vir die toekenning benoem is, is Khotso Mokoena, LJ van Zyl, Willem Coertzen en Ruben Ramolefi.
Danksy sy tweede plek op die wêreldlys vir die 400-hekkies sal Van Zyl die Beinart-toekenning ontvang as Semenya ongeskik verklaar word.
Dié hoë eerbewys word jaarliks gegee aan die Suid-Afrikaanse atleet wat die hoogste op die wêreldlyste geplaas is.
Benewens Semenya, is die benoemde vroue Sunette Viljoen, René Kalmer, Annerien van Schalkwyk en Tsholofelo Thipe.
J.P. van der Merwe, Mulaudzi se afrigter, is die derde keer as afrigter van die jaar aangewys.
- Die Beeld