'Caster-saak moes anoniem gewees het'
2009-09-11 20:02
Londen – Die president van die Internasionale Olimpiese Komitee (IOK) wens die ondersoek na Caster Semenya se geslag kon met meer diskresie en anonimiteit hanteer word.
Jacques Rogge, IOK-president, het gesê dat die saak ernstige sielkundige nagevolge vir Semenya kan inhou. “Hierdie is iets wat die mens se siel aanraak,” het Rogge aan die media gesê.
“Die sielkundige sowel as sosiale implikasies is geweldig. As mens die tyd het, moet so iets met absolute diskresie hanteer word. Sonder om iemand te kritiseer, is dit ook iets wat sover moontlik anoniem gehou moet word,” het hy bygevoeg.
“Ek verstaan egter dat dit alles oor ‘n baie kort tydperk plaasgevind het. As die IAAF genoeg tyd gehad het, sou hulle voor die kampioenskappe ‘n besluit kon geneem het. Dit was egter nie moontlik nie, aangesien die resultate nie beskikbaar was nie.”
Die onderhoud met Rogge is ‘n dag voor die resultate uitgelek het, gevoer.
Volgens berigte in die Daily Telegraph het Semenya nie ‘n baarmoeder of eierstokke nie.
- Sapa-AP