Caster ‘nie bo ander atlete verhewe’
2010-04-15 08:37
Wilhelm de Swardt, Die Burger
Pretoria - Caster Semenya, die vroue-wêreldkampioen in die 800m, is “nie verhewe bo ander atlete nie”.
Daarom is sy nie ingesluit in die voorlopige Suid-Afrikaanse span wat in Julie aan die Afrika-byeenkoms in Nairobi gaan deelneem nie.
Richard Stander, waarnemende administrateur van Atletiek Suid-Afrika (ASA), het gister gesê Semenya moet, nes al die ander atlete, eers aan die kwalifiserende vereistes voldoen.
Volgens Stander het sy tot 13 Julie tyd om die 800m in 2 minute 01.30 sekondes – die kwalifiserende vereiste – of vinniger af te lê.
Talle atlete en ander belanghebbendes is intussen erg omgekrap omdat die verkiesing van ’n nuwe raad vir ASA nie meer in Mei gaan plaasvind nie.
Gideon Sam, voorsitter van Saskok, sê die IAAF het toestemming verleen dat die verkiesing uitgestel kan word.
“Dit is vir die IAAF belangrik dat Deloittes eers sy forensiese oudit van ASA se geldsake afhandel, asook die tugverhore wat daaruit kan voortspruit,” het Sam gesê.
- Die Burger