Caster minder in SA in aksie
2012-01-26 07:01
Pretoria – Caster Semenya, die wêreld se tweede beste vroue-atleet oor 800m, gaan dié seisoen bitter min in Suid-Afrika in aksie wees.
Jukka Härkönen, haar agent, sê dit was ’n fout om Semenya verlede jaar aan soveel wedlope te laat deelneem.
Sy was een van die groot uitblinkers in die plaaslike Geelbladsye-reeks.
Op die Suid-Afrikaanse byeenkoms in Durban het sy binne 70 minute eers die 800 m en toe die 1500 m gewen.
Drie uur later het sy boonop Gauteng-Noord gehelp om die goue medalje in die 4x400-aflos te wen.
Op die Suid-Afrikaanse Studente-byeenkoms in Stellenbosch het sy op een dag die 1500 m en 400 m gewen en die volgende dag die 800 m.
Volgens Härkönen is dit nie goed vir ’n atleet om so baie rond te reis en deel te neem nie.
“Dit het daartoe gelei dat Semenya nie behoorlik kon oefen nie.
“Maria Mutola, haar afrigter, het dit duidelik gemaak dat die Olimpiese Spele net te belangrik is om enige onnodige kanse te waag.
“Daarom is die plan dat Semenya net op die Suid-Afrikaanse byeenkoms in Port Elizabeth aan die 800 m sal deelneem.
“Sy sal dalk een keer ook aan die 400 m en een keer aan die 1500 m deelneem, maar dit is al.”
Volgens Härkönen sal Semenya aan die einde van Mei aan ’n paar wedlope in Europa deelneem.
“Ek het nog nie besluit waar en wanneer nie.”
Diegene wat Semenya vandeesweek op Tukkies se grasbaan sien oefen het, was beïndruk.
Mutola is glo genadeloos wanneer daar geoefen moet word, maar Semenya het elke opdrag voluit uitgevoer sonder om te kla.
Lehann Fourie het die afgelope naweek op ’n binnenshuise byeenkoms in Virginia, VSA, ’n effense terugslag beleef toe hy sy hakskeensening beseer het.
“Dit is niks ernstigs nie. Ek het vir die 60-hekkies se eindronde met ’n tyd van 7.80 sekondes gekwalifiseer, maar toe besluit dit sal dom wees om verder deel te neem.
“Ek neem nou eers weer oor twee weke in Boston (11 Februarie) weer deel. Al die groot name gaan daar in aksie wees.
“Ek weet ek is reg om ’n goeie tyd te hardloop.”
Fourie het reeds vir die Binnenshuise Wêreldbyeenkoms in Istanboel, Turkye, gekwalifiseer.
– Sport24
– Bly op hoogte van al die jongste sportnuus deur Nuus24Sport op Twitter te volg