Caster 'kan deelneem as 'n vrou'
2010-04-08 10:43
Johannesburg – Caster Semenya, die 800m-wêreldkampioen wat in die middel van ‘n geslagsondersoek-debakel is, moet toegelaat word om onmiddellik in vroulike kompetisies deel te neem, het haar prokureurs Woensdag gesê.
Semenya het nog glad nie deelgeneem sedert verlede jaar Augustus toe sy die wêreldtitel in Berlyn gewen het nie.
Atletiek Suid-Afrika (ASA) het dit duidelik gemaak dat Semenya nie verban is om kompeterend deel te neem nie, maar het gesê dat sy vir die resultate van haar geslagstoetse moet wag wat in Junie van die wêreld-atletiekbeheerliggaam (IAAF) sal kom.
Haar prokureurs van Dewey en Lebouf het aan die televisiekanaal eNews gesê dat toetsuitslae wat in Februarie uitgereik was getoon het dat Semenya as ‘n vrou kan deelneem.
“Caster se mediese span het na die resultate van Suid-Afrika en Berlyn gekyk,” het Benedict Phiri gesê.
“Hulle het ook hul eie toetse uitgevoer en daar was ‘n tyd, ek dink middel Februarie, waar ons die goedkeuring gekry het om te sê dat ons na alles gekyk het en gebaseer op wat ons gesien het, glo ons dat Caster geregtig is om in vroulike kompetisies deel te neem.”
Semenya was verlede maand deur ASA verhoed om in Stellenbosch deel te neem en het Dinsdag ‘n verklaring uitgereik waarin sy gesê het dat sy weer van 24 Junie sal terugkeer na atletiek in Zaragoza, Spanje.
Phiri het ook gesê dat die IAAF se prosesse vinnig voltooi moet word, aangesien die 19-jarige se lewe en loopbaan op ys gesit is gedurende hierdie tydperk.
- Reuters