Caster in nuwe storm
2010-01-15 06:34
Johannesburg - Caster Semenya mag nie aan die Geelbladsye-atletiekreeks deelneem nie.
Dié besluit van Atletiek Suid-Afrika (ASA) volg skaars 24 uur ná die aankondiging dat Geelbladsye die volgende drie jaar die nasionale atletiekreeks gaan borg.
Semenya was eergister op ASA se mediakonferensie waar die voortgesette betrokkenheid van die borg aangekondig is. By die bekendstelling is selfs foto’s geneem van haar saam met Lionel Smith, hoofbestuurder van Trudon, wat die Geelbladsye uitgee.
Ethel Manyaka, ASA-woordvoerder, het gesê Semenya mag aan plaaslike en internasionale atletiekbyeenkomste deelneem. Maar gister het Ray Mali, waarnemende voorsitter van ASA, aangekondig Semenya sal nie toegelaat word om aan die Geelbladsye-reeks deel te neem nie.
Toe hy gevra is om dié dramatiese ommekeer te verduidelik, het Mali gesê dit is omdat ASA wag totdat die Internasionale Vereniging van Atletiekfederasies (IAAF) sy amptelike toestemming gee dat Semenya aan die Geelbladsye-reeks mag deelneem. Semenya maak steeds deel uit van ASA se elite-groep atlete en ASA steun haar ten volle.
Sy is nou by ’n nasionale oefenkamp in Pretoria en het die nuuskonferensie saam met haar spanmaats bygewoon.
Mali het gesê Semenya sal net ’n toeskouer by die byeenkomste wees totdat hulle die IAAF se besluit kry.
Nick Davies, woordvoerder van die IAAF, het eergister in ’n e-pos aan Die Burger gesê die IAAF het geen probleem daarmee as Semenya aan die Geelbladsye-reeks deelneem nie. Hy het dit duidelik gestel sy is nie geskors nie en kan deelneem totdat die IAAF ’n finale besluit geneem het.
Mali het egter gesê hy wil dié versekering van die IAAF op skrif hê voordat Semenya toegelaat word om deel te neem.
Die nuwe verwikkelinge om Semenya het atlete en afrigters erg ontnugter. “Ons het gedink daar sal met ASA se nuwe tussentydse raad deursigtigheid wees, maar niks het verander nie. Net die name van die raadslede het verander. Suid-Afrikaanse atletiek bly steeds een groot sirkus,” het ’n erg omgekrapte afrigter gesê.
Enkele van Suid-Afrika se voorste vroue-middelafstandatlete het aan Die Burger gesê hulle weier om teen Semenya deel te neem totdat sekerheid oor haar vroulikheid verkry word.
- Die Burger