Caster Semenya: 'Ek is Junie terug'
2010-04-06 14:09
Johannesburg – Caster Semenya het in ‘n verklaring wat Dinsdag uitgereik is gesê dat sy op 24 Junie sal terugkeer na atletiek by ‘n internasionale vergadering in Zaragoza, Spanje.
Semenya het verder in die verklaring gesê dat sy oor die gebeure van die laaste week nagedink het en dat sy voortgaan om advies van haar mediese en regsadviseurs en diegene naaste aan haar te neem.
“Ek glo dat die besluit om my te verban om verlede week in Stellenbosch deel te neem onwettig en verkeerd was. Tog het ek Atletiek Suid-Afrika (ASA) se versoek dat ek tot die begin van Junie wag vir die uitslag van die IAAF oorweeg.
“Ek verwelkom ASA se publieke verklaring dat hulle sal verseker dat die IAAF by hulle belofte bly om die prosesse teen die begin van Junie voltooi te hê," het sy gesê.
“Ek vertrou dat ASA die eerlike ding sal doen en by hulle woord bly in hierdie verband. Ek het ook my regsverteenwoordigers gevra om bevestiging van die IAAF te kry dat hulle die prosesse teen die begin van Junie voltooi sal hê.
“Ek het dus saam met my afrigter en my agent besluit dat ek sal terugkeer na kompeterende atletiek by die EAA vergadering wat op 24 Junie in Zaragoza, Spanje gehou word.
“Ek herhaal ook dat, gebaseer op mediese en regsadvies, ek sterk staan in my siening dat daar geen struikelblokke is vir my om in vroulike atletiekkompetisies deel te neem nie,” het die verklaring geëindig.
- Sapa