Calla se Nikala speel klaar met gekeurde
2010-04-13 10:31
Christo Buchner, Beeld
Johannesburg - Die stofverwaaide Arthur Ashe-tennissentrum in Soweto lyk nou nie juis na die plek waar drome bewaarheid word nie.
Tog sal dié kompleks ’n baie spesiale plekkie in die hart van die 19-jarige Kapenaar Nikala Scholtz hê.
Dié seun van die oud-heelagter van die Streeptruie, Calla, het gister sy eerste ATP-ranglyspunte verwerf toe hy die agtste gekeurde, Igor Sisjling van Nederland, in die eerste ronde van die Soweto-ope geklop het.
Sy beloning vir dié puik sege van 6-3, 6-2 is ’n ontmoeting met Izak van der Merwe in die tweede ronde.
Van der Merwe het sy landgenoot en mede-Kapenaar Ruan Roelofse met 7-5, 6-3 uitgeskakel.
Die tweede gekeurde in die mans-enkelspel, Karol Beck van Slowakye (78ste ter wêreld), het teen die Sweed Filip Prpic in die stof gebyt.
Prpic het met 6-2, 6-4 geseëvier.
Raven Klaasen van Kuilsrivier in die Kaap moes ook groet. Die Nederlander Raemon Sluiter was met 6-2, 7-6 (7/4) té uitgeslape vir hom.
In die vroue-enkelspel het Chanelle Simmons van Kempton Park leeutemmer gespeel en die derde gekeurde, Klara Zakapalova van die Tsjeggiese Republiek, met 6-1, 3-6, 7-5 verslaan. Sy het onderweg na dié sege ’n wedstrydpunt in die beslissende stel afgeweer.
Dié jong Suid-Afrikaner, nommer 528 ter wêreld, is 451 plekke op die wêreldranglys swakker daaraan toe as die Tsjeg, wat nommer 77 is. Die 17-jarige Simmons, Suid-Afrika se voorste junior, wat onlangs ’n toernooi in Egipte op klei gewen het, sê dit was nogal ’n aanpassing om nou weer op ’n hardebaan-oppervlak te speel.
Die promotorskeuse Christi Potgieter is met 6-3, 6-1 deur die Rus Ksenia Lykina uitgeskakel.
- Die Burger