Button sukkel met sy sitplek
2010-02-04 15:14
Londen – Die Verdedigende F1-wêreldkampioen, Jenson Button het Woensdag vir die eerste keer ’n McLaren gery, maar soos alle nuwe motoreienaars, het die Brit keer op keer sy sitplek verstel.
Button was Woensdag vasbeslote om eers sy sitplek reg te kry voordat hy die renbaan aangedurf het.
Die Grand Prix-seisoen skop op 14 Maart in Bahrain af.
Lewis Hamilton sal saam met Button vir McLaren ry.
Button het die vyfde beste tyd vir die dag behaal, maar Fernando Alonso het almal geklop met ‘n tyd van 1:11.470 in sy Ferrari.
"Dit was ‘n lang dag. Ons het eers teen 01:00 die nag opgepak nadat ons vir ‘n lang tyd met die sitplek van die motor gesukkel het," het Button gesê.
"Ons het baie hard gewerk om my gemaklik te maak. Die sitplek voel altyd anders wanneer jy op die baan klim. Ek het aanvanklik te hoog in die motor gesit,” het hy gesê.
Button het erken dat hy meer tyd op die baan wou spandeer, maar hy het gesê hy weier om hom aan Alonso se tyd te steur.
Die sewemalige wêreldkampioen, Michael Schumacher was die derde vinnigste renjaer van die dag.
"Die oefening gaan meer daaroor om aan die omgewing in die kajuit gewoond te raak, om aan spanwerk te werk, en om deur alle stappe te gaan om seker te maak alles omtrent die motor is in orde,” het Button bygevoeg.
"Die oggend was rof. Ons moes baie aan die motor verander, maar ek pas nou beter in die motor in, wat ‘n goeie ding is,” het hy gesê.
"Hierdie is nie die regte plek om te kyk wie die vinnigste of die stadigste is nie."
- Supersport