Botha wéér in kryt teen Kiwi

2013-02-26 08:23

Sydney – Die opkomende Nieu-Seelandse swaargewigbokser Joseph Parker en die omstrede Francois Botha het glo ingestem om mekaar in Mei in die bokskryt te takel.

Volgens stuff.co.nz het Parker se bestuurder, Sir Bob Jones, bedank oor dié geveg omdat hy ná Botha se onlangse omstrede stryd teen Sonny Bill Williams in Australië voel dis nie die regte besluit nie.

Duco Events, Parker se promotor, gaan egter voort met die reëlings en glo dat die geveg baie aftrek sal kry.

“Ons onderhandel tans met Botha se verteenwoordigers en het al oor bepalings en voorwaardes ooreengekom. Ons praat al ‘n paar weke met mekaar,” het David Higgins van Duco Events gesê.

Die geveg sal glo in Auckland of Hamilton plaasvind.

Botha se onlangse geveg teen Williams was in omstredenheid gedompel ná die dit oor tien rondes beslis is, pleks van 12 soos vroeër besluit is.

Williams het die stryd met 'n puntebeslissing gewen.

Daarna het Botha beweer dat hy geld aangebied is om die wedstryd te verloor. Die Australiese media het ook berig dat Botha positief getoets het vir ‘n verbode middel.

Botha het die gerugte egter ten sterkste ontken.

Williams en Botha sal mekaar glo in Desember weer in Suid-Afrika die stryd aansê

Lees hier meer.

Vir die jongste sportnuus volg Nuus24Sport op Twitter