Bolt-boek dalk spoedig op pad
2009-08-26 13:44
New York – Die naelloopsensasie Usain Bolt se verteenwoordigers vergader met uitgewers oor dié atleet se biografie.
Ricky Simms, Bolt se agent, het gesê hulle is besig om ’n transaksie vir Bolt se boek te onderhandel.
“Ons kan nie veel daaroor sê op die oomblik nie.”
Oor hoeveel van Bolt se persoonlike lewe in dié boek gaan wees is nog nie bekend nie.
Op dié vraag het Simms gesê: “Ons onderhandel al daardie goed”.
Bolt het verlede jaar tydens die Olimpiese Spele in Beijing bekendheid verwerf toe hy goue medaljes in rekordtye in die 100m, 200m en 4x100m-aflos gewen het.
Hy het vandeesmaand tydens die Wêreldkampioenskappe in Berlyn wéér in al drie nommers met die goue medalje weggestap en het sy rekords in die 100m en 200m verbeter.
Bolt sal na verwagting Vrydag in Zurich aan die 100m deelneem en volgende week in Brussel aan nóg ’n wedloop.
Hy beplan ook om op 20 September in Asië vir die eerste keer sedert die Somerspele in 2008 aan ’n wedloop in Shanghai deel te neem.
– Sapa