Bob Hewitt uit heldegalery oor seksklagtes
2012-11-16 12:31
Rhode Island – Die Internasionale tennisheldegalery in Newport, Rhode Island, het die tennisbekende Bob Hewitt geskors oor bewerings dat hy meisies van so jonk as 11 en 12 jaar betas en selfs met hulle seks gehad het.
Hewitt is egter nie verban nie, omdat hy nie aan 'n misdaad skuldig bevind is nie, het die galery se uitvoerende direkteur, Mark Stenning, Donderdag aan die Boston Globe gesê.
Die voormalige dubbelspeler, wat in Australië gebore is, word tans in Suid-Afrika, waar hy woonagtig is, ondersoek.
Vier Suid-Afrikaanse vroue, wat in die 1980’s en 1990’s as jong meisies deur die 72-jarige afgerig is, beweer dat hulle seksueel mishandel is deur die Australiër.
’n Amerikaanse vrou het ook ’n soortgelyke bewering gemaak, wat in Augustus verlede jaar in die Boston Globe gepubliseer is.
Nadat die vrou ’n klag van verkragting teen hom ingedien het, het nog vroue soortgelyke aantygings gemaak.
Hewitt se profiel en naam is van die galery se webtuiste verwyder en sy gedenkplaat is van die muur gehaal nadat 'n aanlyn-versoekskrif verlede jaar begin is om hom uit die heldegalery te kry.
Volg Nuus24Sport op Twitter.
- AFP
