Bloedsweet vir Sharapova in Tokio

2012-09-25 15:11

Tokio – Die tweemalige kampioen Maria Sharapova het Dinsdag na die derde ronde van die Pan-Pasifiese Ope in Tokio deurgedring nadat sy Heather Watson van Brittanje in 'n taai stryd met 6-7 (7), 6-3, 6-4 geklop het.

Die sewende gekeurde Li Na van China en vyfde gekeurde Duitser Angelique Kerber het ook hul onderskeie kragmetings gewen.

Verlede jaar se Wimbledon-kampioen Petra Kvitova, wat vierde gekeur is, is egter deur Petra Martick van Kroasië met 6-4, 6-4 uit die tweede ronde geboender.

Sharapova, wat dié toernooi in 2005 en 2009 gewen het, is onder druk geplaas deur Watson in die eerste twee stelle, maar het koelkop gebly om eindelik die derde en beslissende stel te wen.

Marion Bartoli van Frankryk en Nadine Petrova van Rusland is ook deur na die volgende ronde van die Tokio-toernooi.

Vir die jongste sportnuus volg Nuus24Sport op Twitter.

       

- Sapa - AP