Bloedklont in Serena se long
2011-03-02 19:00
New York – Serena Williams, ‘n voormalige wêreld nommer een-tennisster en wenner van 13 Grand Slam-kampioenskappe, het ‘n noodoperasie ondergaan om ‘n bloedklont uit een van haar longe te verwyder, het ‘n verteenwoordiger van haar Woensdag gesê.
Nicole Chabot het aan People-tydskrif gesê die 29-jarige Amerikaner het Maandag ‘n noodoperasie ondergaan by die Cedars-Sinai Mediese Sentrum in Los Angeles en sy bly in die hospitaal sodat dokters haar toestand kan monitor.
“Serena het verlede week ‘n bloedvatverstopping in haar long opgedoen, wat opgemerk is toe sy na Los Angeles teruggekeer het. Sy was in New York vir doktersafsprake in verband met die aanhoudende probleme met haar voet.
“Die dokters monitor haar toestand.”
Williams het twee operasies aan haar regtervoet ondergaan sedert sy dit op glas gesny het by ‘n restaurant. Sy het nog nie in ‘n topvlak-wedstryd gespeel sedert sy verlede jaar die Wimbledon-titel gewen het nie.
- Vir die jongste Sportnuus, volg Nuus24Sport op Twitter
- Sapa - AFP