Biblioteek spot met Armstrong

2013-01-21 11:48

Sydney – ‘n Biblioteek in Australië het internasionaal nuus gemaak ná 'n plakkaat in die gebou se venster gesê het dat alle boeke oor die gevalle fietsryheld Lance Armstrong na die fasiliteit se fiksie-afdeling geskuif sal word.

Boekwurms moes twee keer kyk toe ‘n kennisgewing by die Manly-biblioteek gewaarsku het dat alle Lance Armstrong-boeke, insluitend Lance Armstrong: Images of a Champion, The Lance Armstrong Performance Program en Lance Armstrong: The World's Greatest Champion, van die nie-fiksie- na die fiksie-afdeling geskuif sal word.

Die kennisgewing is intussen verwyder.

Wendy Ford, wat by die biblioteek werk, het gesê ‘n jong student het die kennisgewing as ‘n grap gemaak.

“Hy het gedink dit sal snaaks wees,” het Ford gesê.

Sy het egter bygevoeg dat hulle nie boeke kán skuif alvorens hulle nie opdrag kry van die van die biblioteek se beheerliggaam nie.

– Vir die jongste sportnuus volg Nuus24Sport op Twitter.
 

- Sapa - AFP