Bergjaers klop padjaers
2010-03-11 09:27
Eunice Visagie
Durbanville- Drie van Suid-Afrika se voorste bergfietsryers het Woensdag die wennerspodium van die Giro del Capo vol gestaan ná die tweede skof van dié padfietstoer.
Burry Stander (Specialized) het die skof hier oor 143 km in ’n tyd van 3 uur, 21 minute en 53 sekondes gewen. David George (safindit.co.za) en Kevin Evans (MTN-Energade) was onderskeidelik tweede en derde. Stander is tans die o.23-bergfiets-wêreldkampioen en Evans die SA marathon-kampioen.
Stander is nou ook die nuwe algehele voorloper in die Giro en sal vandag se skof in die Paarl met die pienk trui begin. Hy het ’n voorsprong van 8 sekondes oor Rene Haselbacher en George. Evans is vierde en 9 sekondes agter. Die eerste nege jaers word deur net 25 sekondes geskei.
Evans het al drie keer Vissershok in die eerste plek uitgeklim en is die nuwe bobaas van die berge. Stander is ook die voorloper in die puntekompetisie.
Die 22-jarige Stander het dalk ’n paar mense wat by die wenstreep gewag het onverhoeds betrap met sy indrukwekkende sege, maar hyself was nie verbaas nie.
“Voor die toer het ons besluit dat ek graag ’n skof sal wil wen. Op dag een het ek goed gevoel en was ek ongelukkig om in die naelrit uitgedruk te word,” het Stander gesê.
“Ek het vir Christoph (Sauser) gesê hy moet vandag (Woensdag) saam met my in die wegbreek-groep kom sodat ek iemand het wat my kan help.”
Met die eerste klim van Vissershok het die bondel opgebreek en Sauser was saam met Stander in die wegbreek-groep van ongeveer 20 jaers.
“Met die laaste klim het Christoph so bietjie harder getrap in ’n poging om van die ander ouens uit te lok om hom te volg en dit is presies wat gebeur het. Ek kon elke keer net op iemand se wiel sit om by te bly. Ná dit was die verantwoordelikheid myne om die skof te wen. Daar was ’n paar pogings van die ouens om weg te kom, maar in die laaste 500 m was ek op Kevin se wiel en toe weet ek, ek het dit.”
Vandag se voorlaaste skof oor 171 km begin om 09:30 in die Paarl.
* Organiseerders van Sondag se Argus-fietstoer het deelnemers intussen gevra om geel te dra ter ondersteuning van Lance Armstrong se wêreldwye veldtog teen kanker, Livestrong. Armstrong het sy stryd teen kanker gewen en daarna tussen 1999 en 2005 die Tour de France ’n ongeëwenaarde sewe keer op ’n streep gewen.
- Sport24