Bergfiets-ster Evans spog met trofee in padtoer
2010-09-28 07:46
Beeld
GRASKOP - Kevin Evans (MTN-Energade) het Sondag sy jaar van eerstes voortgesit toe hy die vierdaagse Clover-fietstoer in die Laeveld gewen het.
Dit is die eerste keer dat ’n plaaslike bergfietsryer ’n padfietstoer wen.
Vroeër vanjaar het Evans ook die eerste bergfietsryer geword wat die Suid-Afrikaanse padfiets-tydtoets vir beroepsjaers gewen het.
Boonop is hy ook die Suid-Afrikaanse marathon-kampioen in bergfietsry.
Shaun Ward (Panda) was algeheel tweede, 70 sekondes ná Evans, met die 19-jarige Jason Bakke (House of Paints) derde, 75 sekondes agter.
Gawie Combrink (TCS), wat eintlik ’n amateur is, het Sondag vir ’n groot verrassing gesorg toe hy die laaste skof in 2:53:01 gewen het.
Dawid Maree (House of Paints) was tweede en Luthando Kaka (Medscheme) derde.
Die 33-jarige Evans het dit baie duidelik gemaak dat hy nie dié toer sou kon gewen het as dit nie vir sy spanmaats was nie.
“Ek gaan vir Reinardt Janse van Rensburg, Bradley Potgieter en Stanley Namanyane elk een van my rooitruie (algehele voorloper) gee, want my toersege is net soveel hulle s’n.”
Volgens Evans was die Clover-toer beslis een van die taaiste toere waaraan hy tot nog toe in Suid-Afrika deelgeneem het.
“Ek het so vinnig in my kop uitgewerk dat ons in vier dae amper 9 000 meter geklim het, wat teoreties beteken dat ons Mount Everest uitgetrap het.”
Evans was vol lof oor die vertoning van die jong jaers.
Die 19-jarige Bakke en 20-jarige Richard Baxter (albei House of Paints); die drie 19-jariges – Paul van Zweel, Shaun-Nick Bester en HB Kruger (Cyclelab-Toyota) – die 21-jarige Van Reinardt Rensburg (MTN-Energade), die 21-jarige Maree en 24-jarige Kaka het hulle as belowende toerryers bewys.
Dit was opmerklik dat die jaers wat die hele jaar nog die helde in Suid-Afrikaanse padfietsry was nie een in dié vierdaagse toer met sy langer skofte en strawwe klimme die mas kon opkom nie.
Die vraag is wat gedoen gaan word om die jong toerryers te help om hul volle potensiaal te verwesenlik.
Gaan daar toegelaat word dat hulle, soos vele van hul voorgangers, net verdwyn terwyl die een naelryer ná die ander plaaslike fietsry bly oorheers?
Kaka is beslis een van die toer se groot helde. Hy was in Saterdag se skof vierde.
Eintlik is dié ryer se vertonings in die Clover-toer ’n aanklag teen Suid-Afrikaanse fietsry.
Vir die afgelope vier jaar is hy bloot as ontwikkelingsjaer beskou, maar die oomblik toe die renne strawwer raak, kon hy hom laat geld.
Maree het Saterdag se padfietsskof gewen, terwyl Bakke verras het toe hy Evans in die heuwelklim-tydtoets geklop het.
Bakke het met sy wentyd van 19 minute en 40 sekondes die rekord vir die heuwelklim-tydtoets oor 7.3 km teen Kowynspas op verbeter.
Joanna van de Winkel (Cyclelab-Toyota) het die vroue-toer gewen.
- Beeld