Benni straks weer op pad

2012-12-12 11:59

Johannesburg - Benni McCarthy gaan dalk binnekort weer vir Suid-Afrikaanse sokker verlore wees.

Die doelskieter is tans in die laaste ses maande van sy kontrak met Orlando Pirates en mag in Januarie met ander klubs vir die 2013/14-seisoen begin onderhandel.

McCarthy se verteenwoordigers het ook laat deurskemer dat die veteraan 'n "laaste avontuur" soek voor hy sy stewels ophang, het die Sowetan Woensdag berig.

Klubspanne in Amerika sowel as China het reeds aangedui dat hulle in sy dienste belangstel, terwyl Kaizer Chiefs en Mamelodi Sundowns McCarthy glo ook dophou.

Daar bestaan egter steeds die moontlikheid dat hy by Pirates sal aanbly, alhoewel die Buccanneers nog nie met die doelskieter oor 'n moontlike kontrakverlenging gepraat het nie.

Vir die jongste sportnuus volg Nuus24Sport op Twitter.

– Sport24