Bafana haal kwarteind van Afrikabeker-toernooi

2013-01-28 07:19

Durban – Bafana Bafana het tot die kwarteindronde van die Afrikabeker-toernooi (Afcon) deurgedring nadat hul laaste groepwedstryd teen Marokko gelykop geëindig het.

Met minder as vyf minute se speeltyd oor, het Siyabonga Sangweni Sondag in Durban die telling gelyk gemaak en Bafana Bafana se plek in die kwarteindronde bespreek. Dit is die eerste keer in meer as 'n dekade wat die nasionale span tot die kwarteindronde deurdring.

Issam el Adoua het 'n doel in die 10de minuut van die wedstryd aangeteken en die besoekers het teen rustyd 1-0 voorgeloop.  May Mahlangu het in die 71ste minuut 'n doel vir die gashere aangeteken en die telling gelyk gemaak.

Mehdi Namli het Marokko se tweede doel aangeteken, met minder as agt minute se speeltyd oor, waarna Sangweni in die doodsnikke van die wedstryd sy doel aangeteken het.

Bafana Bafana sal Saterdag by die Moses Mabhida-stadion te staan kom teen die naaswenners van groep B.

In 'n ander wedstryd het die Kaapse Verdiese Eilande 2-1 met Angola in Port Elizabeth afgereken en tweede in die groep geëindig. Dié span sal in die volgende ronde in Port Elizabeth te staan kom teen die groep B-wenners.

– Volg Nuus24Sport op Twitter

- SAPA