'Aussies wat opkikkers gebruik, moet bieg'

2012-11-16 14:29

Kaapstad – Australië se agentskap teen verbode middels (Asada) het fietsryers wat opkikkers tydens hul loopbaan gebruik het, aangemoedig om na vore te kom.

"Die dae van swyg, van vrees oor wat gaan gebeur as die waarheid uitkom en van die beskerming van diegene wat by die gebruik van verbode middels betrokke is, is vir altyd verby," het Asada se uitvoerende hoof, Aurora Andruska, Vrydag in 'n mediaverklaring gesê.

Andruska het bygevoeg dat sommige fietsryers reeds bekentenisse gedoen het.

Asada het gesê 'n atleet of 'n lid van die span wat sy foute erken en bereid is om oortredings wat deur ander gemaak is te onthul, sal "ten volle bygestaan en ondersteun" word.

Dié liggaam het sy eie ondersoek geloods nadat Usada (Amerika se agentskap teen verbode middels) bevind het dat Lance Armstrong en sy US Postal-span verbode middels gebruik het.

Vir die jongste sportnuus volg Nuus24Sport op Twitter.


 

- Reuters