Aussie het Nadal in visier
2011-01-21 07:56
Melbourne. – Kort nadat Rafael Nadal Donderdag met ’n kragvertoning sy teenstanders hier in die Australiese Ope gewaarsku het, het die promotorskeuse Bernard Tomic gesê hy is slaggereed om ’n einde aan die Rafa Slam te bring.
Die eerste gekeurde, Nadal, het die Amerikaner Ryan Sweeting met 6-2, 6-1, 6-1 in die tweede ronde ’n tennisles geleer en sy opmars na ’n vierde agtereenvolgende Grand Slam-sege voortgesit.
Volgens dié Spanjaard het hy nie meer las van die virus wat sy voorbereiding vir die Aussie-ope belemmer het nie.
Nadal probeer om die eerste speler sedert 1969 te word wat vier Grand Slam-titels agtereenvolgens wen. Omdat dit nie in een kalenderjaar is nie, het die media dit die Rafa Slam gedoop.
“Elke dag voel ek beter. Ek het volkome herstel,” het Nadal, wat al sedert die Franse Ope 23 agtereenvolgende Grand Slam-wedstryde gewen het, gesê.
Die 18-jarige Tomic, ’n Australiër, is sy teenstander in die derde ronde en dié tiener is gewis nie op sy bek geval nie.
Tomic het Nadal se landgenoot Felicano Lopez, wat 168 plekke bo hom op die wêreldranglys is, met 7-6, 7-6, 6-3 geklop.
“Ek het niks om te verloor nie. Ek gaan nie op die baan stap om te verloor nie. Ek gaan speel om te wen. Ek het ’n ideale geleentheid. Ek dink nie hy (Nadal) hou van my spel nie. Die manier waarop ek dinge afwissel, gaan hom pla,” het Tomic gesê.
Andy Murray van Skotland (4de gekeur), het sy plek in die volgende ronde bespreek met ’n sege oor Illya Marchenko van die Oekraïne. Die telling was 6-1, 6-3, 6-3. Toe Murray sy oorwinning beklink het, het dit meer gelyk soos feesvieringe by ’n sokkerwedstryd.
“Die atmosfeer op dié baan (die Margaret Court-arena) is van die beste in tennis,” het Murray gesê oor die 6 000 luidrugtige ondersteuners.
“Dit is baie lekker om in die Aussie-ope te speel. Dit gee jou ekstra energie. Ek sal nie omgee om al my wedstryde hier te speel nie.”
Swede se Robin Soderling het die eerste keer in sy loopbaan die derde ronde hier gehaal. Hy bou voort op sy goeie peil in 2010 toe hy die eindstryd van die Franse Ope en die kwarteindronde in die Wimbledon-toernooi en die Amerikaanse Ope gehaal het.
Die gunsteling om met die vroue-titel weg te stap, Kim Clijsters, het Carla Suarez Navarro van Spanje met 6-1, 6-3 van die baan gevee.
In teenstelling met die selfversekerde Clijsters moes die Rus Vera Zvonareva (2de), spook om die derde ronde te haal. Bojana Jovanovski van Serwië het haar met 6-2 skrikgemaak voor sy met 6-3, 6-1 gewen het
Jelena Jankovic (7de) is uitgeskakel. Pen Shuai van China het die Serwiër met 7-6, 6-3 geklop.
Vir die jongste sportnuus volg Nuus24Sport op Twitter.
- Reuters