Aus Ope: Sharapova op oorlogspad

2013-01-16 11:20

Melbourne – Die tweede gekeurde Maria Sharapova het slegs 47 minute benodig om haar tweederonde-kragmeting by die Australiese Ope in Melbourne te wen.

Die Rus het haar opponent, die 21-jarige Misaki Doi van Japan, 'n tennisles gegee toe sy haar met 6-0, 6-0 by die Hisense Arena verniel het.

Sharapova, Australiese Ope-kampioen in 2008, was ook meedoënloos in die eerste ronde toe sy Olga Puchkova met 6-0, 6-0 geklop het.

Sy kan moontlik in die volgende ronde teen die sewemalige Grand Slam-wenner Venus Williams speel, wat Woensdag in die aandsessie teen die 41ste gekeurde Alize Cornet van Frankryk te staan kom.

In ander uitslae het die negende gekeurde Australiër Samantha Stosur 'n skoknederlaag gely toe sy met 6-4, 1-6, 7-5 deur Zheng Jie van China verslaan is.

Vir die jongste sportnuus volg Nuus24Sport op Twitter.

- AFP