Atletiek SA hét toe geweet
2009-09-12 09:38
Wilhelm de Swardt en Sarel van der Walt
Atletiek Suid-Afrika (ASA) het vóór Caster Semenya se vertrek na die Wêreld-atletiekbyeenkoms in Duitsland reeds geweet dat sy ’n mediese toestand het wat haar prestasie in die gedrang sou kon bring.
Sy het in opdrag van ’n ASA-beampte op 7 Augustus in die Medforum-hospitaal in Pretoria ’n soortgelyke geslagstoets ondergaan as die een waaraan sy later in Duitsland onderwerp is, het Beeld betroubaar verneem.
ASA hou voet by stuk so ’n toets is nooit gedoen nie, hoewel dit gedoen is op versoek van die Internasionale Vereniging van Atletiekfederasies (IAAF).
Die Pretoriase toetsuitslae is nogtans nooit aan die IAAF deurgegee nie, het Nick Davies, woordvoerder van die IAAF, gesê.
“Dalk het ASA geskrik vir die uitslae (van die Pretoria-ondersoek).”
Beeld het op goeie gesag verneem dr. Harold Adams, ASA se spandokter wat glo teenwoordig was toe die toets in Pretoria gedoen is, het kort voor die Wêreldbyeenkoms ’n versoek gerig tot Leonard Chuene, president van ASA, om Semenya eerder aan die byeenkoms te onttrek.
Chuene het geweier.
Adams het volgens inligting voor die einde van die Wêreld-byeenkoms reeds na Suid-Afrika teruggekeer en is die afgelope drie weke reeds onbereikbaar.
Semenya is glo voor die halfeindronde van die 800?m by die Wêreld-byeenkoms deur ASA genader en gevra of sy nie kan voorgee sy is beseer nie. Sy het geweier.
Net voor die eindronde het Semenya wéér ’n volledige toets – wat deur die IAAF laat doen is – ondergaan. Sy het later in mediaberigte vasgestel waaroor die toetse gegaan het, het Beeld se bron gesê.
Die uitslag van die Pretoria-toets is glo feitlik dieselfde as wat later by die ondersoek in Berlyn bevind is en wat nou wêreldwyd opslae maak. Daarin is óók bevind sy het nie ’n baarmoeder of eierstokke nie.
Semenya het glo ná die toetse aan vriende gesê sy is “gescan”, maar het nie geweet hoekom nie.
’n Woordvoerder van die Medforum-hospitaal wou nie bevestig dat Semenya in dié hospitaal ondersoek is nie.
Makhenkesi Stofile, minister van sport en ontspanning, sou gistermiddag ’n brief aan die IAAF stuur en bewyse van die uitslae van die IAAF se toetse aanvra.
“Ons wil afskrifte daarvan hê sodat Suid-Afrikaanse wetenskaplikes dit onafhanklik kan ondersoek,” het hy gesê.
Stofile het ook gesê hy wil hê ASA moet sy rol in die Semenya-sage aan hom verduidelik.
Die IAAF het gister in ’n verklaring daarop gewys die toetsuitslae wat eergister aan ’n koerant in Australië gelek is, is nie die amptelike bevindings van die toetse wat in Berlyn op Semenya gedoen is nie.
Semenya, wat haar intussen aan vandag se SA veldloopbyeenkoms in Pretoria onttrek het, is volgens Beeld se inligting “verslae” oor al die nuwe feite rondom haar.
’n Dokter sou gister aan haar verduidelik wat “hermafrodities” en ander mediese terme beteken.
- Beeld